كسّر بأيدك عصا موسى و شد الحيل
و اصْلِي ذراريهم ببطشك من صنوف الويل
و ابعت مراسيلك تجيب السحر و السحرة
و ادفن عصا موسى و قول دي عصا قادرة
تخدع شعوب المنطقة بالفعل دي غادرة
يبقى الخلاص منها ندفنها في الصحرا
بكره هــ تطرح عصا موسى شجر و نخيل
و تعانق اللي انظلم و تداوي جرح عليل
بكره عصا موسى هــ تشق قلب الليل
و تعاقب اللي افترى و سرق جفون النيل
و تعلم اللي ظلم إن الزمن دوار
و الصبح مهما اختفى لازم هيجي نهار
****
و قول على داوود مزماره صوته نشاز
و امنع وصول الهوا و امنع كمان الغاز
مش بس يكفي كده ابني الجدار بفولاذ
مش كل مبنى بــ يعلى يبقى تحته أساس
و لا كل ظالم هــ يبقى, دا الزمن دواس
و لا كل ضحكة تدوي يبقى فيه أعراس
و لا كل صوت يرتفع يوصل قلوب الناس
لو صوت داود اتحبس هـ تحاربك الأنفاس
****
و اوعى يغرك بالكلام الحلو و بحِكَمُهْ
لقمان زمانه و حكمته ثابتة بكل مكان
و قول عليه أجنبي و احنا هنا السكان
و امنع دخوله القصر بالفرمان
ممنوع وجوده هنا .... محظور هنا لقمان
أصل الحكاية حكاية فكر مش أكثر
و الفكر أصبح حقايق في الميدان تظهر
عايزني أفضل هنا و هناك أسود تزأر ؟
أنا قلت دي المشكلة , قطعان نعاج بتعيش
علي ابن عمه أسد و ع العدا خفافيش
****
مش بس دي المشكلة , اسمع كمان القول
مكيال شعيب عندنا بـ يطفف الميزان !
و التهمة ثابتة عليه , بـ يقولوا م الإخوان !
بـ يقول شريعة ربنا بـ ينادي بالقرآن
و يقول كمان يا عرب م توحدوا الأوطان
أنا قلت مش مشكلة مبيعرفوش تواريخ
و الأدهى من كل ده تصنيعه للصواريخ !
بالله عليكم قلولي عقلهم راح فين ؟
سيبنا اللي بيدمر و بنحاصر رجال الدين
و نقول على اللي يحافظوا ع الوطن مجانين
طول ما احنا يا أمتي للظلم بنسلم
و لا مرة يوم نشتكي أو حتى نتألم
يبقى داوود عندنا صوته بيزعجنا
موسى عصايته هنا دي أصل إرهابنا
مكيال شعيب مشكلة , كيله هـ يتعبنا
يا اما يا أمتي على كل ظلم نثور
أو تستكيني كده ويبقى حرام النور
.jpg)
ليست هناك تعليقات:
إرسال تعليق